Според предлог-законот, од пазарот ќе бидат повлечени вкусовите како бисквит, чоколада, лубеница, овошје, па дури и виски, кои се особено популарни и кај тинејџерите и кај возрасните, а ќе бидат поштедени само електронските цигари со вкус на тутун и ментол, јавува грчкиот репортер.
Извор: EPA/DAVID CHANG, илустрација
Секторот за е-цигари во Грција вработува околу 10.000 луѓе, вклучително и 2.000 специјализирани трговци на мало.
Предлог-законот е поднесен од Министерството за здравство и е во завршна фаза на јавна расправа.
Тој е усогласен со препораките на Европската унија за продажба на електронски цигари, додека седум земји од ЕУ досега воведоа забрана за различни вкусови - Финска, Латвија, Литванија, Естонија, Данска, Холандија и Унгарија.
Со законот ќе се воведе општа забрана за продажба на алкохол и сите тутунски производи на малолетни лица, додека продажбата на алкохол на малолетни лица ќе биде преквалификувана во кривичниот законик како полесен прекршок.
Аналитичарите во Атина велат дека предлог-законот е чекор во вистинската насока, главно поради неговиот фокус на сузбивање на пристапот на малолетниците до алкохол и тутунски производи, бидејќи, на пример, ќе им даде на властите овластување да затворат продавници или клубови фатени како продаваат тутун или алкохол на малолетници.
Од друга страна, здружението на трговци со производи за испарување во писмо до Владата предупреди дека целосната забрана ќе доведе до префрлање на 400.000 корисници на испарување на „неконтролираното“ црно пазарче.